نواز لیگ نائن زیرو یاترا - جناب زاہد مصطفی کے قلم سے

اگر جذبات سے لوگ ذرا ہٹ کے سوچیں تو مانیں گے کہ مسلم لیگ کے پاس نائن زیرو جانے اور MQM کے پاس نون لیگیوں پر گل پاشی کے علاوہ کوئی آپشن ہی نہیں تھا- بلکہ اگر یہ کہا جائے تو غلط نہیں ہوگا کہ نواز لیگ نے نائن زیرو آنے میں کچھ تاخیر کی اور وجہ تاخیر یہی تھی کہ MQM کا دماغ لندن ڈرامے کے ذریعے ٹھیک کیا جائے اور ان کے ساتھ اپنی شرائط پر معاملات طے کیے جائیں اس لیے لندن ڈرامے کی کچھ اقساط پیش کرکے باقی کی اقساط تکنیکی خرابی کی بنیاد بنا کر موخر کردی جائیں گی۔

نواز لیگ کو آخر نائن زیرو جانے کی ضرورت کیوں پیش آئی ۔ یہ وہ سوال ہے جس کے ذریئے نواز لیگ کی مجبوری سمجھی جاسکتی ہے . کراچی شہر کی 20 سے زائد قومی اسمبلی کی اور ہاف سنچری کے قریب صوبائی اسمبلی کی نشستیں ہیں- حالیہ الیکشن میں حسب سابق اسٹیبلشمنٹ نے MQM کو کھلی چھوٹ دیکر کراچی کو ان کے حوالے کر دیا گیا- پاکستان کے "حقیقی اور محب وطن" منصوبہ سازوں کا منصوبہ تو یہی تھا کہ نواز لیگ کو اتنی نشستیں مل جائیں کہ حکومت بنا نےکیلئے MQM کی بیساکھیوں کی ضرورت پڑے لیکن پنجاب میں "فرشتوں " کی طرف سے ان کو کچھ زیادہ ہی ووٹ پڑ گے اور کسی بیساکھی کی ہی ان کو ضرورت نہیں پڑی اور اسٹیبلشمنٹ بھی اپنا مکروہ کھیل کھیلنے سے محروم ہوگئی۔

 
لیکن الله کے ہاں کچھ اور منظور تھا کراچی میں جماعت اسلامی کے بے وقت کے بائیکاٹ اور قتل و غارت سے بیزار لوگوں نے ایک بڑی تعداد میں PTI کو ووٹ ڈال کر ایک متبادل کے طور پر لے آے . جماعت اسلامی جو کبھی MQM کے متبادل کے طور پر لی جاتی تھی وہ تیسرے نمبر پر چلی گئی . الیکشن کے بعد اگر نواز لیگ MQM کے خلاف ایکشن لیتی ہے تو کراچی PTI کی جھولی میں جا گرے گا اور اگر MQM کے ساتھ جاتی ہے تو بدنامی سر لیتی ہے . اب آپ خود ہی سوچئے سیاسی طور پر نواز لیگ کیلئے بہتر یہی تھا کہ بدنامی لے لی جائے بجائے کراچی کو PTI کے حوالے کرنے کے . اور ویسے بھی لیگیوں کے تو تب کان کھڑے ہوگئے ہونگے جب ہارون الرشید نے مسلسل کراچی کو ٹھیک کرنے اور چوھدری نثار کے بارے میں مسلسل اچھے کلمات لکھنے شروع کردئے - اس لیے اب نواز لیگ کیلئے بہتر یہی ہے کہ اچھے وقتوں کا انتظار کیا جائے اور اچھا وقت نواز لیگ کے لیے تب ہی آئے گا جب نواز گورنمنٹ کراچی میں دو تین میگا پراجیکٹ اور امن بحال کرے گی . اس وقت ان کے پاس صحیح وقت ہوگا MQM پر ہاتھ ڈالنے کا اور کراچی میں اپنی جگہ بنا نے کا . تب تک آپ خود ہی سوچیے نواز لیگ نائن زیرو پر سجدہ ریز نہ ہوتی تو کیا کرتی اور ویسے بھی جب اچانک سید منور حسن نے PTI کے صدارتی امیدوار کی حمایت کا اعلان کیا تو صاف ظاہر ہوگیا کہ کہ نواز لیگ اور MQM ہم نوالہ ہم پیالہ بننے والے ہیں . پس صاحبان "راولپنڈی " سے اسلام آباد اور وہاں سے کراچی اور لندن تک آیندہ کم از کم دو سالوں تک سکھ چین لکھ لیجیے . باقی رہا سوشل میڈیا تو وقت گزاری کیلئے اور دل کی بھڑاس نکلنےکیلئے "غالب یہ جگہ اچھی ہے"

-----------------------

جناب زاہد مصطفی یہاں ملیں گے۔